Natalie Sindile Nyathi
KoBulawayo Ijaha elisakhulayo elihlala Cowdray Park libulele umngane walo ngelitshe ekudlaleni kwabo.
Kutholakele ukuthi abafana laba babhale izifundo zabo zesigaba esine ezingeni laphezulu (O’ level) emnyakeni odluleyo.
Abafakazi bathi amajaha la ebedlala emgwaqweni wesigabeni seGarikai/Hlalani Kuhle usibanga sama15 lapho abahlala khona. Ekudlaleni kwabo kube lokungakhulumisani kuhle, okwenze ukuba omunye walamajaha adobhe ilitshe atshaye ngalo omunye wakhe ngemva kwendlebe okubangela ukuthi ahle afe khonapho.
Kubelokukhothisana umlotha ngemva kokuba imuli kambulali ihambe yayacela uxolo kuleyo elahlekelweyo yathembisa njalo ukuncedisa emsebenzini wokungcwaba umufi.
Ukubulalana kwabantwana kungathi sekwandile edolobheni lakoBulawayo, enyangeni ezidlulileyo, umfundi weHamilton High School wafa ngemva kokugwazwa ngomunye umfana obefunda eFounders High School ezama ukulamula ingxabano ebikhona phakathi kukamngane wakhe labafundi beFounders.
Uzulu uyaxwayiswa ukuthi azame ngazo zonke indlela ukuthi abalekele udlakela ngendlela zonke ngoba impilo yomuntu iqakathekile.