Natalie S Nyathi
Ukuwohloka kwedola laseziZimbabwe okuqhubekayo nsuku zonke sekuphoqe abanengi ukuba basebenzise ingqondo ngokujulileyo ukuze benelise ukuziphilisa.
Imali yakuleli iqhubeka iphela amandla okuthenga osekwenze abanengi basebenzise idola lase Amelika. Umnotho awusasebenzeki ngemali yakuleli osekubangele ukuba abantu abanengi, ikakhulu ontanga bahlanganise ingqondo bequnse amaqhinga okuziphandela njengoba uhulumende esehluleka ukwenza kubelamafekithali kusetshenzwe.
Elinye lamaqhinga elibunjwe ngontanga yikuthengisa yonke into ethengisekayo kusetshenziswa i-intanethi (internet) ikakhulu kuWhatsApp laku Facebook.
Hayi-ke umkambo weWhatsApp, kumbe i-intanethi ayikhethi ukuba kuthengiswani. Kuyatholakala imifanekiso yepmahla ezitshiyatshiyeneyo ezigoqela imiganu yendlini, impahla zokugqoka, imota, izindlu, izifuyo lokunye okunenginengi.
Leliqhinga lokuthengisa nge i-intanethi selidale abantu ababizwa ngokuba ngabagijimi,(Runners). Umsebenzi wabagijimi yikuya phathela abathengisi impahla zokuthengisa kwezinye indawo kumbe kwamanye amazwe.
Abathengisi, bayafaka amaoda (orders) kubagijimi, abagijimi bephaphatheke begcwale ilizwe kumbe beqe imingcele besiyadinga lezompahla ezifunekayo.
Abagijimi sebakhe amaqembu kumkambo weWhatsapp lapho abathengisi abatshengisa khona (advertise) imifanekiso yemphahla ezithengiswayo.
Kulumkambo, ababuki kumbe abathengi bayakhulumisana labathengisi kuvunyelwane ukuba yiziphi impahla ezifunekayo. Kulokuthembana okukuba abathengi bayahlawula ingxenye (deposit) yemali anduba impahla zithengwe. Kungathatha amalanga ambalwa ukuba umathenga athole impahla zakhe abeseqedisake ukubhadala.
“Isimo somnotho wezwe lethu senze ukuba ngibe ngusomabhizinisi ngisemncane ngiletshumi elilodwa lesitshiyagalombili leminyaka yokuzalwa. Ngingusomabhizinisi wesifazane. Ngenelisa ukwehlisa umthwalo okhangelane labazali bami ekugcineni inani lezingane eziyisithupha njengoba iholo labo lanxa lingahlanganiswa abalithola njengababalisi ungelamsebenzi, awenelisi izidingo zemuli yonke”, kuchasisa u-Ashy Ndlovu ongumgijimi.
Laba bagijimi babone ukuba isidingo zempahla ezidumileyo (trending) zentsha ebizwa ngokuthi ngama2k abathanda ukuhambisana lemafeshini labanye nje abantu abale mali zabo zokuzichaza, baqoqa ukuba lezompahla zitholakale masinyazana. Ngaleyo ndlela besebenzise lokho ngokuhlinzeka ngemikhiqizo edumileyo evela kude njengeTanzania, eDubai, eZambia laseNingizimu yeAfrika.
Intengo zalezimpahla iqala emalini ku-US$5 yase Amelika kungabe yisigqoko, amasudu abesilisa asuka ku- R700 imali yeNingizimu Afrika lamasudu amabili abesifazane abe ngu-$US25.
USandile Tshuma ongumbalisi sebanga eliphansi uthi,
“Isimo somnotho sesiphenduke isibusiso ngendlela ethize okungangokuthi ngifunde ukucabanga masinyazana kanye lokwenza imisebenzi eminengi ngaphangifundisa ikakhulu ukuthengisa impahla ku-intanethi”.
Lapho bebuzwa ngenhlupho abahlangana lazo ebhizimisini labo le-Intanethi,
abagijimi abaningi bakhala ngokuthi bahlangana labathengi abalolaka nxa engatholanga amsinyazana lokhu abayabebekuqambile bekubone ku-intanethi, kwesinye isikhathi azifiki impahla ngoba phela, omagijima bangenisa impahla lezompahla ezivela phetsheya ngendlela ezingavunyelwanga emthethweni (smuggle).
Lanxa ukuthengisa kwempahla ku-intanethi kuphathisa abanengi, ukhona njalo uKhothama, isitolo esitholakala kumasitalada phose onke jikelele ako Bulawayo lapho impahla zokugqoka zitholakala ngentengo ebanjwe ngumqando.
UKhothama, zimpahla, ezithengiswa ziphuma kumabhele zendlalwe phansi, abathengi bezidobhe bekhotheme.
Ziyathengeka ngoba nge-$US0.50, okuyi 500 Bond (ZWL$500) amadola akuleli, umuntu angathola amasokisi njalo umuntu uyazikhethela
.