11 January 2022
Londiwe Dube
Ongumkhokheli weqembu leZAPU, umnumnzana Sibangilizwe Nkomo ubikwa ekhala ezimathonsi ngemva kwesehlakalo sokudilizwa kwelitshe eliyisikhumbuzo sabantu abafa ngeGukurahundi eBhalagwe esempumalanga yeMatebeleland, eKezi.
Indawo le yaziwa ingumgodi osentabeni, lapho okwaphoselwa khona abantu ababulawa ngamabutho elizwe, i 5th Brigade ngesikhathi seGukurahundi. Lelibutho lafundiswa ukuqeqesha umsebenzi walo e North Korea.
Lelibutho lafakwa elizweni lamaNdebele (Matabeleland) lase Nkabazwe (Midlands), lihlose ukudinga amabutho eyelwelimpini yenkululeko kodwa asehlamukela uhulumemde babuyela ezihotshweni bebhidliza umnotho welizwe.
UHulumende we Zanu-PF, wakulelo banga, wasekubona kufanele ukuthela ke ibutho le 5th Brigade kundawo eziqanjiweyo.
Kulokuba ibutho leli lidinge abahlamuki, lona labulala abantukazana ababengelakuzivikela.
Inani labantu elabulawayo libaliswa lisedlula (20 000 write this in siNdebele).
Abantu abanengi babulawa kabuhlungu ngendlela ezingeke zaphindwa, abanye babedatshulwa izisu bephila, abanye bequnywa izitho zomzimba, njenge ndlebe, iminwe, izandla lokunye nje.
Abanye babulawa bebanengi ngasikhathi sinye bajikelwa bangcwatshwa kugodi linye.
Manengi amangcwaba anjalo ku Matabeleland jikelele, elinye liyileli elise Kezi I Bhalagwe.
Kuthe ngokunanzelela inani labantu abalele kulowo mgodi iqembu leZAPU beselibone kufanele ukuba lihloniphe leyondawo ngokuyakhela ngamatshe basebeyitha ibizo elithi ‘ilitshe lesikhumbuzo’
Lokhu bakwenzela ukuthi abantu abalokhe belenhliziyo ezophayo ngokulahlekelwa yizihlobo zabo bathole ukududuzeka lapho bebona behlonitshwa.
Emavikini ambalwa adluleyo bekubikwa ukuthi kulabantu asebekhipha amatshe la bewasebenzisa ukwakha izinto ezitshiyeneyo ngakho abebandla leZAPU bebelokhu besadinga abantu abenza ulunya olungaka
Umnunzana Sibangilizwe Nkomo obevakatsele leyondawo ngoMgqibelo ukuyohlola ubika ukuba kulabantu abahlasele ilitshe lelo balidiliza batshisa kwasala kuzimvuthu.
”Into eyenzakale eBhalagwe yinto elihlazo kakhulu, into embi enyanyekayo. Kuyinhlamba esizweni samaNdebele njalo kuyikudelela lokhu”, kutsho uSibangilizwe Nkomo
USibangilizwe Nkomo ngomunwe wabantwana abazalwa liqhawe lezwe le Zimbabwe, umuyi u Joshua Mqabuko Nyongolo Nkomo, olele endaweni yamaqawe I Heroes Acre.
Ekufikeni kwakhe umnumnzane uNkomo uthi ufike wakhala kakhulu ngoba ebona ukuba abantu abenze lokhu bebelenhloso yokutshengisa ukungahloniphi njalo kuyikugolomba abantu.
“Ngitshone khonaphana okonakale khona ngikhala, ngikhalela abantu bethu ababulawa khonapho njalo ngithiyile ukuthi ngibona lawomagwala ayenza amahlazo anje ngobusuku ukuthi asondele eduze sikhulume”, kuqhubeka uNkomo.
Uthi isenzo lesi sivusa amanxeba ebantwini abafelwa yizihlobo zabo ngendlela ebuhlungu kukanti njalo inengi lafela ize.
Umnumzana uNkomo ocabangela ukuthi abantu abenza ulunya olungaka kubangaba ngabeqembu le ZANU-PF, uthi lokhu kufana lokuthela isawudo esilondeni esivulekileyo njalo kulihlazo esizweni samaNdebele ngoba kutshengisa ukungahloniphi imizimba yabantu abafayo.
“Sizama ukuziduduza lokuhlonipha abantu bethu ababulawa kabuhlungu kuthiwa ngamawuwu besifa egameni leZAPU, besifa egameni likaNkomo. Lokhu okwenzakeleyo kuyingumbamazwi ngokunjalo asisenakuthula, sesifuna isisombuluko ngokufa kwabantu bethu.
Sifuna ukwazi ukuthi omama ababezithwele babedlwengulwelwani, bedatshulwa izisu kuthiwa bathwele abathengisi. Sidinga i justice ngoba ukuthula kwethu sekusuka kubengathi asilandaba lezihlobo zethu ezafayo”, kulandisa uMnumzana Sibangilizwe Nkomo.
Nyakenye umkhokheli weqembu elibusayo i Zanu-PF ongumkhokheli welizwe uMnuzana Emmerson Mnangagwa usungule uhlelo lokubq indaba ye Gukurahundi ihlangululwe njalo iqgitshwe. Kusenjalo uhlabezulu uyalusola loluhlelo ngoba luvalela amaqembu amanengi ayencedisa abangaphathekanga ngesehlakalo se Gukurahundi.
Amaqembu abizwa yikuba Bulawayo Collective, amiswa ukuba bequbeke ngendlela zabo zokuzama ukukhulumisana lohulumende ngodaba lwe Gukurahundi.
Umnu. Mnangagwa wanikeza uhlelo lwe Gukurahundi kuziNduna zezigaba ezehlukeneyo zelizwe.
Kusenjalo ihulumende kumbe amapholisa akula nyathelo esilithethe ukutshengisa ukungavumelani lezigilamkhuba ezidilize leyondawo ngokunjalo umnumnzana Sibangilizwe Nkomo uthi kufanele kube lesisombuluko ngendaba yeGukurahundi.